అవకాశాలు వస్తున్న చోటుని వదులుకుని లేని చోట తాపత్రయపడడాన్ని ఏమంటారు? మీకు తెలీకపోతే ఒకసారి పూజ హెగ్డేను అడిగితే తెలుస్తుంది. ఎందుకంటే తెలుగులో ఆమెకు బంగారం లాంటి అవకాశాలు బోలెడు వస్తున్నాయి. కానీ ఆమె చూపు మాత్రం బాలీవుడ్ వైపే ఉంది. పూజ హెగ్డేకు మొదటినుండి బాలీవుడ్ లో సక్సెస్ అవ్వాలనే కల. తెలుగులోనే ఆమె డెబ్యూ జరిగినా ఆమె మాత్రం బాలీవుడ్ లో ప్రయత్నాలను కొనసాగించింది. ఇక్కడ వరసగా ముకుంద, ఒక లైలా కోసం సినిమాలను చేసింది పూజ హెగ్డే. నిజానికి ఈ రెండు సినిమాలు పెద్దగా ఆడింది లేదు. ముకుంద ప్లాప్ అవ్వగా, ఒక లైలా కోసం యావరేజ్ గా ఆడింది. అయినా కానీ పూజ హెగ్డే తెలుగు ప్రేక్షకులను ఇంప్రెస్ చేసింది. చూడటానికి అందంగా ఉండడం, కొంచెం హైట్ కూడా ఉండడంతో పొడుగ్గా ఉండే హీరోల పక్కన పెర్ఫెక్ట్ గా సెట్ అవుతుందన్న భావన కలిగించింది పూజ హెగ్డే.
అయితే సరిగ్గా తెలుగులో పుంజుకునే టైమ్ లో బాలీవుడ్ లో అవకాశమొచ్చిందని వెళ్లిపోయింది. హృతిక్ రోషన్ సరసన మోహెన్ జోదారో సినిమాలో నటించింది. దీని కోసం టాలీవుడ్ కు దాదాపు రెండేళ్లు దూరం కావాల్సి వచ్చింది. ఈ రెండేళ్లు టాలీవుడ్ లోనే ఉండుంటే ఆమె అప్పుడే స్టార్ హీరోయిన్ అయిపోయేది. ఏదైతేనేం డీజే సినిమాతో మళ్ళీ టాలీవుడ్ లోకి స్టన్నింగ్ ఎంట్రీ ఇచ్చింది పూజ హెగ్డే. ఇక అక్కడినుండి ఆమె వెనుతిరిగి చూసుకోవాల్సిన అవసరం లేకుండా పోయింది. వరసగా స్టార్ హీరోల సరసన అవకాశాలు క్యూ కట్టాయి. మహేష్ తో మహర్షి చేసింది. ప్రభాస్ సరసన జాన్ సినిమాకు ఎంపికైంది. దాదాపు 30 రోజుల కాల్ షీట్స్ కు ఆమెకు కోటిన్నర దాకా చెల్లిస్తున్నారు ఇక్కడి నిర్మాతలు. మళ్ళీ అదనంగా తన స్టాఫ్ కు 25 లక్షలు చెల్లించాలి. ఇంత సౌకర్యవంతంగా ఇక్కడ ఉంటే ఆమె మళ్ళీ బాలీవుడ్ కలలే కంటోంది.
ఇటీవలే పూజ హెగ్డే హిందీలో చేసిన హౌస్ ఫుల్ 4 విడుదలైంది. అక్షయ్ కుమార్ హీరోగా నటించిన ఈ చిత్రంలో పూజ హెగ్డే కాకుండా కృతి సనన్, కృతి కర్బందా కూడా హీరోయిన్స్ గా నటించారు. మరో ఇద్దరు హీరోయిన్స్ ఉండడంతో పూజకు స్పెషల్ గా దక్కిన గుర్తింపంటూ ఏం లేదు. కృతి కర్బందాకు ఉన్న స్క్రీన్ స్పేస్ కూడా ఈమెకు దక్కలేదు. దీనికోసం ఆమె మూడు నెలలు లాక్ అయిపోయింది. పైగా హిందీ సినిమా అంటే ప్రమోషన్స్ ఓ రేంజ్ లో చేయాలి. దానికోసం ఏకంగా నెల రోజులు కేటాయించింది. ఇక్కడ ఆమెకు ఉన్నంత హోదా అక్కడ ఆమెకు దక్కదు. పైగా హౌస్ ఫుల్ 4 ఒప్పుకోవడం ఇక్కడ రెండు పెద్ద సినిమాలను వదిలేసుకోవాల్సి వచ్చింది. దీపం ఉండగానే ఇల్లు చక్కబెట్టుకోవాలంటారు. కానీ పూజ హెగ్డే మాత్రం దీపం గురించి పట్టించుకోకుండా గాలికి వదిలేస్తోంది. అది కనుక ఆరిపోతే ఇక అంతే సంగతులు. చెప్పిన సామెత అర్థమైందిగా. లేదంటే దీపం స్థానంలో తెలుగు సినిమాను పెట్టి మళ్ళీ చదవండి. ఇక్కడ అవకాశాలు తగ్గితే మొదటికే మోసం వస్తుంది. కాదంటారా?
from టాప్ స్టోరీస్ – Telugu Movie Reviews | Telugu Cinema Reviews https://ift.tt/2pcC1Va
Comments
Post a Comment